Almatydaǵy № 4 blokpostaǵy jol kólik oqıǵasynyń saldarynan qaıtys bolǵan polısıa qyzmetkeriniń biri Dastan Abdyqanovtyń áıeli Dınara Abdyqanova ZTB instagram paraqshasyna bildirgen pikirinde kúdikti – BMW kóliginiń júrgizýshisi marqum kúıeýiniń áriptesi bolǵanyn aıtty.

Buǵan deıin Almatynyń polısıa departamenti júrgizýshiniń polısıa sapynda istegenin rastaǵan.

"Jan túrshigerlik jol-kólik oqıǵasyn jasaǵan júrgizýshi buǵan deıin polısıa shenin taqqany ras. Ol polısıada 6 jyl jumys istep, qyzmettik mindetin durys atqarmaǵandyqtan 4 márte táptiptik jazaǵa tartylǵan. Artynsha ishki ister organynan shyǵarylǵan. Alaıda ol budan keıin de durys qorytyndy shyǵara almapty. Zańdy buzyp, aýyr saldaryn bile tura mas kúıinde rólge otyryp, qulmys jasady" degen Almaty polısıa departamentiniń bastyǵy Qanat Taımerdenov.

Onyń aldynda polısıa departamentindegiler kúdiktiniń polısıada istegenin joqqa shyǵarǵan. Departamenttegiler bastapqydaǵy mundaı pikirdi tıisti aqparattyń kelip túspegenimen túsindirdi.

Sondaı-aq jelide "kúdiktiniń ákesi de polıseı bolǵany, onyń jýyrda ǵana zeınetke shyqqany" týraly aqparat taraýda.

Shamsharhan Ómirzaqov atty jeli qoldanýshysy kúdikti oqıǵa bolǵan kezde polısıa formasynda bolǵan bolýy múmkin dep sanaıdy. Óıtkeni kúdikti ustalǵan sátte túsirilgen sýretterde ol jalańash jatyr.

Búginde kúdiktige qatysty eki nemese odan da kóp adamdy óltirgeni úshin QR QK 99-babynyń 2-bóligi boıynsha sotqa deıingi tergeý bastalǵan.

25 mamyr kúni tańǵa jýyq Almatydaǵy № 4 blokbekette BMW júrgizýshisi mas kúıinde beton qorshaýǵa soǵylyp baryp, ınersıamen patrúldik polısıa kóligin soqqan. Jol-kólik oqıǵasynan eki polısıa qyzmetkeri kóz jumdy. Taǵy bir polıseıdiń jaǵdaıy aýyr.